Mfl. karla í Dominos deildinni mun mæta nýliðum Hattar í kvöld, fimmtudaginn 9. nóvember, kl. 19:15 í Schenkerhöllinni.
Haukaliðið hefur tapað síðustu tveim leikjum í jöfnum og spennandi leikjum og hefur verið stígandi í leik liðsins og er liðið smátt og smátt að mótast með tilkomu nýrra leikmanna. Varnarleikur liðsins er allur að koma til og sóknarleikur liðsins að verða betur smurður. Fyrri hálfleikur á móti sterku liði Tindastóls á Króknum sýndi að liðið er á réttri leið og nú er bara að ná heilum góðum leik, bæði sóknar- og varnarlega.
Lið Hattar er nýbúið að skipta um erlendan leikmann og virtist hann koma með góða straum í liðið því Höttur vann síðasta leik sinn á móti Þór Ak. á útivelli í bikarnum og sýndi að það þarf að taka liðið alvarlega. Eftir nokkur slæm töp í deildinni er ljóst að þessi sigur í bikarnum mun gefa þeim sjálfstraust og því er mikilvægt fyrir lið Hauka að byrja sterkt og vera ákveðnir allan leikinn.
Eins og áður segir, byrjar leikurinn kl. 19:15 og hvetum við allt Haukafólk og áhugafólk um skemmtilegan körfubolta að mæta i Schenkerhöllina og hvetja strákana til sigurs.