Það var allt annað að sjá til strákanna okkar í leiknum á móti Val í SS bikarkeppninni í kvöld. Gestirnir byrjuðu samt sem áður betur og komust í 4-7. Okkar strákar bitu þá frá sér og jöfnuðu 8-8 og komust yfir 11-8 og 13-10. Staðan í hálfleik var 13-11 okkar strákum í vil. Mikil barátta var í liðinu og var allt annað að sjá leik liðsins.
Í byrjun síðari hálfleiks skiptust liðin á að skora. Valsmenn náðu að jafna 16-16 og komast yfir 16-17. Eftir það skiptust liðin á að skora, og Valsmenn höfðu eins marks forystu þar til í stöðunni 21-21. Haukamenn komust yfir og mikil spenna í loftinu. Ennþá skiptust liðin á að skora. Í stöðunni 24-23 gáfu strákarnir okkar allt í botn og komust í 26-23 og sigruðu að lokum 27-24.
Þetta var góður sigur og strákarnir því komnir í 8 liða úrslit SS bikarnum. Þessi sigur er vonandi upphafið af góðri tíð og það er ósk allra Haukamanna að nú fari allt að ganga okkur í hag.
Næsti leikur hjá strákunum er eins og hjá stelpunum á laugardag. Klukkan 16:15 á laugardag taka strákarnir okkar á móti Val, nú í DHL deildinni. Það verður því tvöfaldur laugardagur á Ásvöllum 18.nóvember.
ÁFRAM HAUKAR!!