Jæja, þá er sumarið loksins komið og fyrsti leikur í 4-liða úrslitum karla alveg að bresta á. Við vonum að strákarnir okkar komi vel undan vetri því mótherjar þeirra eru engir aðrir en KA menn, fulltrúar höfuðstaðs Norðurlands. Fyrsti leikur verður á Ásvöllum þriðjudaginn 27. apríl kl. 19:15. Annar leikur á Akureyri fimmtudaginn 29. apríl kl. 19:15. Ef til kemur verður þriðji leikur á Ásvöllum sunnudaginn 2. maí.
Haukar og KA hafa marga hildi háð á undanförnum árum og án ef verða þetta hörkuleikir, já blóð, sviti og tár. Þetta verður spenna og aftur spenna og enginn ætti að láta þessa leiki fram hjá sér fara. Við Haukar fjölmennum að sjálfsögðu og hvetjum okkar lið. Þessir leikir verða örugglega frábær skemmtun, strákarnir okkar gefa allt í leikina og við áhorfendur verðum að gera slíkt hið sama. Strákarnir þurfa á stuðningi okkar að halda og þeir áhorfendur sem ekki komast norður á fimmtudag verða bara að gefa tvöfalt í leikinn á þriðjudaginn.
Þetta er þriðja árið í röð sem Haukar og KA mætast í 4-liða úrslitum. Í fyrra, 2003, unnu Haukar báða leikina en vorið 2002 vann KA báða. Ef við grúskum aðeins meira, þá hafa liðin mæst ellefu sinnum þessi þrjú tímabil. Haukar hafa unnið 6 leik, KA 4 leiki og einn hefur farið jafntefli. Haukar skoruðu 351 mark í þessum leikjum og KA 328.
Ef við förum aðeins lengra aftur þá mættust Haukar og KA í úrslitum vorið 2001 og sælla minninga þá unnu Haukar Íslandsmeistaratitilinn eftir fimmta leik á Akureyri.
Glæsilegar tölur en þær gefa okkur ekki stig í næstu leikjum. Þess vegna mæta allir stuðningsmenn Hauka á leikina. Við styðjum strákana okkar, skemmtum okkur og munum hvað það getur verið rosalega gaman.
Góða skemmtun – Áfram Haukar.
.