Haukar voru með tvo fulltrúa í 16 liða úrslitum Poweradebikarsins, meistaraflokkinn og B-liðið.
Liðin léku leiki sína síðastliðinn sunnudag og mánudag og því miður töpuðust báðar viðureignir.
Haukar B fengu Njarðvík í heimsókn á sunnudaginn og urðu fyrir algjörri slátrun þar sem að Njarðvík vann 57-112.
Meistaraflokkur Hauka fékk ÍR í heimsókn á mánudagskvöldið og þrátt fyrir gríðarlega góða spilamennsku í öðrum og þriðja leikhluta þá sigraði ÍR 78-95.
Haukar byrjuðu frekar illa á móti ÍR sem áttu algjörlega fyrsta leikhlutann og voru yfri 19-31 að honum loknum. Þegar annar leikhlutinn var hálfnaður þá kveiknaði aldeilis í strákunum og áttu þeir 16-0 kafla á rétt rúmum tveimur og hálfri mínútu. Andri Freysson hóf þennan kafla með sniðskoti og endaði hann með þriggjastigakörfu. Inn á milli skoraði Þorsteinn Finnbogason tvo þrista í röð og Haukur Óskarsson bætti við einum til. Flugu því 4 þristar niður í röð hjá Haukum á þessum stutta kafla og gagnurinn á þeim til alls líklegur. Staðan í hálfleik var 45-43 Haukum í vil.
Haukar héldu áfram glæstri spilamennsku og um miðjan þriðja leikhlutann voru þeir komnir 10 stigum yfir í stöðunni 65-55. ÍR náðu þá að laga til spilamennsku sína og tókst að jafna muninn á loka sek. leikhlutans og því jafnt 70-70 í upphafi fjórða. Þá virtust heilladísir Hauka, sem voru búnar að sveima yfir þeim í öðrum og þriðja leikhlutanum þegar allt gekk upp, hafa yfirgefið þá því ekkert gekk upp og skoruðu þeir aðeins 8 stig í lokaleikhlutanum. Því fór að ÍR sigraði nokkuð örugglega 78-95.
Stigahæstir hjá Haukum voru Haukur Óskarsson með 17 stig, Þorsteinn Finnbogason með 14 stig, Davíð Páll Hermannsson með 12 stig og 13 fráköst og Emil Barja með 12 stig, 7 fráköst og 8 stoðsendingar.
Nánari tölfræði um leikinn hjá KKÍ
Haukar B riðu ekki feitum hesti gegn Njarðvík sem voru yfir allan leikinn. Staðan var 17-27 fyrir Njarðvík að loknum fyrsta leikhlutanum en þá tók Emil Örn Sigurðarson (nýráðinn aðstoðarþjálfari meistaraflokks Hauka) til sinna ráða og undir hans forustu áttu Haukar B sinn besta kafla í leiknum. Emil skoraði tvo þrista í röð og átti svo stoðsendingu á Svein Ómar Sveinssin sem setti sjálfur niður þrist. 9-0 kafli Haukum B og aðeins einu stigu undir í stöðunni 26-27. Þá skellti Njarðvík öðrum kananum sínum inn á og nokkrum mínútum síðar voru báðir kanarnir komnir inn á og því ekki að spyrja, staðan í hálfleik 33-53 fyrir Njarðvík.
Í seinni hálfleik fengu kanarnir að hvíla sig og ungu strákarnir fengu að spreyta sig á gömlu köllunum í Haukum B sem réðu ekkert við þessa ungu fola og eftirleikurinn auðveldur hjá Njarðvík sem kórónaði leikinn með tveimur troðslum í tveimur seinustu sóknum sínum. Auðveldur 57-112 sigur fyrir Njarðvík.
Stigahæstir hjá Haukum B voru Sveinn Ómar Sveinsson með 15 stig og 10 fráköst og Daníel Örn Árnason með 12 stig og 4 fráköst.