Björgvin Hólmgeirsson og Guðmundur Árni Ólafsson gengu til liðs við Hauka fyrir þetta tímabil auk þess sem Jónatan Jónsson snéri aftur heim. Þessir leikmenn eru að stíga sín fyrstu skref í Evrópukeppninni og leggja því duglega inn í reynslubankann þetta haust þegar hver stórleikurinn rekur annan. Björgvin átti mjög góðan leik gegn FH á dögunum og er sífellt að finna sig betur á miðjunni þar sem hann myndar sóknarpar með Tjörva Þorgeirssyni sem er sömuleiðis að axla meiri ábyrgð á þessu tímabili. Það verður fróðlegt að sjá þá félaga etja kappi við nokkuð hávaxið lið Pler KC frá Ungverjalandi á morgun.