Það er ljóst eftir leiki dagsins að Haukar spila við FH um sæti í Pepsí-deild kvenna á næsta ári. Topplið B-riðils, Selfoss, vann í dag Fram 5-0 og Haukar unnu á sama tíma Völsung á Húsavík 1-0 með marki Dagbjartar Agnarsdóttur í fyrri hálfleik. Selfoss er því með fjögurra stiga forskot á Hauka á toppi riðilsins þegar aðeins ein umferð er eftir, leikur Hauka og Selfoss á Ásvöllum laugardaginn 20. ágúst nk.
Í spjalli við Heimi Porca þjálfara Hauka eftir leikinn á Húsavík sagði hann Húsavíkurstelpur hafa verið sprækar og átt nokkur góð færi undan vindinum í fyrri hálfleik á sama tíma og hans stúlkur hafi virkað þreyttar eftir langt ferðalag í morgun. Haukastúlkur hafi hins vegar verið
sterkara lið á vellinum og náð að halda sigurgöngu sinni áfram. Sex sigrar í röð og Dúfa Dröfn markvörður hefur haldið markinu hreinu þessa sex leiki.
Heimir sagði í lok spjalls ferðina á Húsavík vera skemmtilega og að góð stemning væri í hópnum. Nú væri ljóst að Haukar spila við FH tvo leiki um sæti í Pepsí-deildinni og sagði hann Haukastúlkur hlakka mikið til að spila þá leiki.
15.8.2011. Gunnar Baldursson var á leiknum á Húsavík á laugardag og sendi okkur í dag eftirtaldar myndir:
