Haukar.is
Félagið mitt

Næsta laugardag mætum við Keflavík í Pepsideild karla á Vodafonevellinum kl 16:00. Athugið að þetta er breyttur leiktími. Nú er liðið farið að sýna sitt rétta andlit og eftir frábæran sigur á firnasterkum Blikum er komið að því að leggja Keflvíkinga að velli. Við stjórnvölinn hjá suðurnesjaliðinu er fyrrum þjálfari Hauka Willum Þór og má með sanni segja að þeir hafi verið stálheppnir í rokinu suður með sjó í fyrri umferð þegar Keflavík stal af okkur tveimur stigum. Nú er að fjölmenna og styðja okkar menn. 

 Athugið breyttan leiktíma: Laugardagur kl 16:00

Áfram Haukar 

Nú á mánudaginn 23. ágúst mæta okkar menn í Kópavoginn og etja þar kappi við Blikana. Það má segja að þessi leikur sé í raun úrslitaleikur. Þessi leikur verður að vinnast til að halda vonum okkar um Pepsideildarsæti að ári. Leikurinn hefst kl 18:00 sem er nýr leiktími. Mætum öll á völlinn og hvetjum okkar menn. 

Áfram Haukar!!!!! 

Næstkomandi Mánudag 16. ágúst mætum við sprækum löxum úr Garðabæ, en þá mun Stjarnan mæta á Vodafonevöllinn. Þetta er gríðarlega mikilvægur leikur því með sigri komum við okkur í ágæta stöðu fyrir lokaátökin í deildinni. Við höfum sýnt það í sumar að Haukar spila fantaflottan fótbolta, en herslumunin hefur vantað. Með okkar stuðningi tökum við laxveiðimennina úr Garðabænum og sýnum þeim hvernig eigi að fagna mörkum með stæl. Allir á völlinn og styðjum okkar menn.´

Áfram Haukar 

Þann 1. ágúst lagði af stað, frá höfuðstöðvum KSÍ, 18 manna landsliðshópur U17 karla áleiðis til Finnlands til þátttöku á opna norðurlandamótinu í knattspyrnu. Í þessum hóp áttu Haukar fjóra landsliðsmenn, þá Aron Jóhann Pétursson, Þórð Jón Jóhannesson, Magnús Þór Gunnarsson og Arnar Aðalgeirsson.

Í leiknum gegn Finnum skoraði Arnar Aðalgeirsson fyrir Ísland og fengu allir strákarnir tækifæri í þeim leik. Haukar mega vera stoltir af því að eiga fjóra Haukastráka inn á sama tíma. Spilaðir voru þrír leikir og með Íslandi í A-riðli voru Danir, Finnar og Englendingar.

Landsliðið okkar spilaði svo um 5. sætið við Skotland. Eftir venjulegan leiktíma var staðan 1 – 1, þá var gripið til vítaspyrnukeppni, sem var löng og ströng en strákarnir fóru með sigur af hólmi 7 – 6 og 5. sætið öruggt.

Með strákunum á myndinni er þjálfarinn þeirra Freyr Sverrisson.

Í tilefni að umræðu í fjölmiðlum um stöðu Hauka í Pepsideild karla og um þjálfaramál félagsins vill félagið koma eftirfarandi á framfæri:

Á undanförnum árum hefur mikil áhersla verið lögð á uppeldisstarf í félaginu og hefur mikill metnaður verið lagður í að gera barna og unglingastarf félagsins sem best úr garði. Markmiðið er að byggja upp innan frá og stuðla að því að Haukar eigi framtíðarlið í úrvalsdeild karla og kvenna. Þetta faglega starf er að skila miklum árangri sem sést að 4 leikmenn U17 ára landsliðs Íslands eru frá Haukum. Félagið hefur á að skipa frábæru þjálfarateymi og starfsmönnum og markmið félagsins eru ekki skammtíma árangur heldur uppbygging til framtíðar þar sem hagur leikmanna er í heiðri hafður. Félagið horfir fram á bjarta knattspyrnuframtíð og efniviður félagsins og aðbúnaður er einn hinn besti á landinu.

Þjálfari meistaraflokks félagsins er hluti af þessu teymi. Undir stjórn Andra Marteinssonar hefur félagið farið upp um tvær deildir á mjög skömmum tíma þar sem byggt hefur verið fyrst og fremst á uppöldum Haukamönnum. Þegar liðið náði þeim frábæra árangri á síðasta ári að tryggja sér sæti meðal hinna bestu var strax lögð á það mikil áhersla að þeir leikmenn sem hart hafa lagt á sig fengju tækifæri til að spreyta sig meðal hinna bestu. Liðið var styrkt með reynslumeiri leikmönnum sem gætu miðlað af þekkingu sinni til yngri kynslóðarinnar. Árangur liðsins hingað til hefur ekki uppfyllt væntingar stuðningsmanna né stjórnarmanna enda markmið allra sem standa að liðinu að liðið muni áfram vera á meðal hinna bestu keppnistímabilið 2011. 

Stjórn knattspyrnudeildar, rekstrarfélags Hauka og allir leikmenn liðsins hafa fundað um stöðu liðsins og þjálfaramál félagsins. Allir hlutaðeigandi aðilar lýsa yfir fullum stuðningi við þjálfara liðsins og alla þá starfsmenn sem koma að liðinu. Saman erum við sannfærð um að félagið muni tryggja framtíðarsæti í úrvalsdeild undir stjórn Andra Marteinssonar, Arnars Gunnlaugssonar og þeirra teymis. Félagið er á réttri braut og áframhaldandi uppbygging innan félagsins mun gera Hauka að toppliði meðal hinna bestu innan fárra ára. 

Við skorum á allt Haukafólk að þjappa sér að baki félaginu og styðja við bakið á liðinu á endasprettinum. Öll höfum við okkar skoðanir á hvað er rétt og rangt og hverjir eiga að vera í liðinu og hverjir ekki, en sama hver stjórnar þá munum við alltaf vita betur. Stöndum saman og verum stolt af því að vera HAUKARI.

Stjórn Knattspyrnudeildar Hauka

Rekstrarfélag Hauka

Leikmenn Meistaraflokks Hauka